नंदुरबार जिल्ह्यात चालणार्‍या क्वेस्टच्या प्रकल्पाचा भाग म्हणून ‘पश्चिम खानदेश भिल्ल सेवा मंडळ’ या संस्थेच्या चार शाळांमधील मुलांसाठी क्रीडा शिबिराचा उपक्रम दर महिन्याला राबवला जातो. एकूण 40 मुले यात सहभाग घेतात. धावणे, खो-खो अशा क्रीडाप्रकारांचे या शिबिरात प्रशिक्षण दिले जाते.

दिनांक 28 फेब्रुवारी हा विज्ञान दिन म्हणून साजरा केला जातो. त्याचे औचित्य साधून दिनांक 27 फेब्रुवारी, 2011 रोजी क्वालिटी एज्युकेशन सपोर्ट ट्रस्ट अणि शिक्षक अभ्यास मंडळ यांच्या एकत्रित प्रयत्नाने वाडा तालुक्यातील इयत्ता पाचवी ते आठवीच्या विद्यार्थ्यांसाठी वैज्ञानिक खेळणी बनवण्याची कार्यशाळा स्वामी विवेकानंद विद्यामंदिर वाडा येथे आयोजित केली होती. या कार्यशाळेचा मुख्य उद्देश होता, की मुलांना विज्ञान शिक्षण अधिक मनोरंजक आहे याची जाणीव व्हावी, आणि खेळण्यांच्या स्वरूपात विज्ञान शिकून त्यांचा आनंद घेता यावा.

सोनाळा गावातील क्वेस्ट संस्थेचे सरस्वती साधन केंद्र येत्या महिन्यात सर्वांसाठी खुले झाले आहे. दि. 18 डिसेंब2010 पासून या केंद्रात काही नव्या उपक्रमांना सुरुवात झाली आहे.

‘Clowns without Borders’  (सीमाविरहीत विदूषक) ची भेट

‘Clowns without Borders’ (सीमाविरहीत विदूषक) च्या तीन सदस्यांनी क्वेस्टला डिसेंबर २१, २००९ला भेट दिली. ‘Clowns without Borders’ ही विना-नफा तत्त्वावर चालणारी आंतरराष्ट्रीय संस्था आहे. त्यांच्या संकेतस्थळावर (www.clownswithoutborders.org) नमूद केल्याप्रमाणे, “ही संस्था माणसांच्या वेदनामुक्तीसाठी हास्य प्रदान करते. विशेषत: आपत्ती-क्षेत्रात वास्तव्याला असलेल्या मुलांवर ही संस्था भर देते. निर्वासितांच्या छावण्या, संघर्ष-प्रदेश आणि आणीबाणीच्या पेचप्रसंगात सापडलेल्या भूभागांमध्ये वास्तव्यास असलेल्या मुलांसाठी संस्था विशेषकरून कार्यरत आहे. आम्ही समकालीन विदूषक/सर्कस प्रकारातील सादरीकरणासोबत एक अवखळपणा आणतो. ज्यामुळे सर्व मुले एकत्रितपणे आनंदोत्सवात रममाण होतात आणि त्यामुळे त्यांच्या आयुष्यावर पडलेल्या दु:खाच्या गडद छायेला काही क्षण विसरून जातात.